Te Mahi Hei

Te Mahi Hei

Kātahi te rangi ātaahua! Kua tae noa atu a Hata mā ki te pātiki hei. Te roroa hoki o ngā karaehe! Ko te rā tēnei e tapahia ai te hei, kia kore ai ngā kararehe e matekai i te takurua. I ētahi tau, he āhua nui tonu te kai. I ētahi tau atu hoki, he āhua kore kai tonu tēnei wāhi. Ahakoa rā, ka whakatūpato tonu a Hata, kei tūpono ki te tau kore kai. He taraki-hana kei te tō i te moua. I ngā rā o mua, mā te hōiho kē te moua e tō. I ēnei rā, mā te mīhini e mahi te nuinga o ngā mahi. Ka huri haere te tarakihana i te pātiki, ka whai haere atu a Tamahae mā, hei whakawātea i ngā karaehe mō te moua.

Tino pai te haere o ngā mahi. Kāore anō tētahi raruraru kotahi kia pā mai. E whiowhio haere ana a Hata. I warea kē ia ki te whiowhio, kāore ia i kite i tētahi hō e takoto ana i roto i ngā karaehe. Kātahi a Tamahae mā ka rongo atu i a Hata e kanga ana, "Ko wai te taurekareka nāna nei i waiho te hō ki konei takoto ai?"

Ka titiro atu ia ki a Tamahae, ka titiro kē a Tamahae. Mōhio tonu ia ko Tamahae taua taurekareka nei. Ka kanga anō ia, "Titiro! Kua wha-tiwhati katoa ngā mata o te moua nei! Kāore e oti tēnei hei te tapahi ākuanei! Nā tō whakaaro kore i pēnei ai!" E rua rā rawa a Hata e tapahi ana i te hei, ka oti. Nā te whatinga o ngā mata o te moua i pēnei ai.

Ao ake i te ata, ka rongo a Rewi i ngā kurī e auau ana. Tere tonu tana oma ki waho ki te mātaki. Kātahi ia ka titiro atu ki te pātiki hei.

Aue! E kai mai ana te pūru me ētahi kau i ngā karaehe o te pātiki hei.

Nā te aha rā i uru ai ngā kararehe nei ki roto i te pātiki hei?

KO HATA: E tama mā, nā wai i tuku te pūru me ngā kau ki roto i te pātiki hei?

KO TAMAHAE: Kāore au e mōhio. Tērā pea nā te pūru i wāhi te taiapa, nō te mea kei te kati tonu hoki te kēti.

KO REWI: Āe, he tino tika te kōrero a Tamahae. Titiro atu ki tērā pito o te taiapa! Kua motumotu katoa ngā waea. Ki tōku whakaaro, nā te pūru tērā mahi. He tino kino tērā pūru. He tino kaha ki te takakino taonga. Pūhia, kei mate tētahi tangata!

KO TAMAHAE: Māku e whiu tēnā pūru ki waho. Kātahi a Tamahae ka oma atu ki te whiu i te pūru. Ko Rewi i haere ki te whiu i ngā kau. Kāore a Tamahae i whakaaro mō te kino o te pūru rā. Ka oma tika tonu atu ia me tana rākau. Tere tonu te huri mai o taua pūru ki te tuki i a Tamahae. I te kitenga atu o Tamahae i te pūru rā e oma mai ana ki te tuki i a ia, ka huri ia, ka oma. E auau ana ngā kuri, e mātakitaki ana a Rewi me ngā kau. I te tino mataku o Tamahae, ka pekea e ia te taiapa. Ahakoa neke atu i te kotahi mita me te hāwhe te teitei, pai noa iho ki a ia te peke. Ka pakipaki a Rewi, ka karanga mai, "Ka pai koe ki te peke, Tamahae! He pai atu koe i te tia ki te peke!" Kāore a Tamahae e whakahoki. Kua mamae katoa tana tīnana. Kei te takoto tonu ia.

I ngā rā o mua, he tino tokomaha ngā tāngata haere mai ai ki te mahi hei. Nā te putanga mai o ngā mīhini pēre hei, ka māmā te mahi.

Kāore he mahi take hei inaianei. Kāore he mahi whakatū pou hei hiki i ngā hei ki runga i ngā take. Kāore hoki he maharahara mō te whāngai i tētahi rōpū nui. He pai noa iho te mahi hei ki te rōpū tokoono, toko-whitu rānei-kotahi hei taraiwa i te tarakihana tō i te mīhini pēre hei, kotahi hei whakakao i ngā hei, kotahi hei taraiwa i te taraka, tokorua ki runga i te taraka, tokorua, tokotoru rānei, hei uta i ngā pēre ki runga i te taraka. Ka kī te taraka, ka mauria ngā pēre hei, ka tāketia ki raro i tētahi whare motuhake, kia kore ai e mākū i te ua. I te takurua, ka utaina ngā pēre hei ki runga i te taraka, ka tohatohaina ki waenganui i te pātiki, hei kai mā ngā kau.