איראן נוצט פארלענגערטע פייער אפּשטעל צו פארכאפּן שיפן אין הארמוז

טעהראן – איראן האט פארכאפּט צוויי שיפן אינעם "הארמוז וואסער וועג" נעכטן, דאס ערשטע מאל זינט די מלחמה האט זיך אנגעהויבן, און דאס קומט נאך וואס פּרעזידענט טראמפּ האט פארלענגערט דעם פייער אפּשטעל אנדעם וואס ער זאל שטעלן א פרישע דעדליין פאר די רעזשים.

טעהראן האט געזאגט אז אויב וויל אמעריקע א פולשטענדיגע פייער אפּשטעל, וועט זי מוזן אראפּנעמען די מיליטערישע בלאקאדע אויף איראנער פּארטן. די רעזשים האט אויך פּאראדירט מיט באליסטישע מיסילס אויף די גאסן פון טעהראן און געווארנט אז הארמוז איז ווייטער אונטער איר קאנטראל.

דערווייל פּרובירט פּאקיסטאן צוריקצוברענגען ביידע לענדער צום פארהאנדלונגס טיש און סקעדזשולען א פרישע רונדע געשפּרעכן, טראץ וואס עס זענען דא זייער אסאך אומקלארע אישוס. ווי עס זעט יעצט אויס, איז דא א שטארקע מעגליכקייט פאר א זיצונג אין איסלאמאבאד מארגן פרייטאג.